Биыл Астана су қоймасынан 50 мың тонна лай шығару жоспарланған және бұл қойма соңғы рет 55 жыл бұрын тазартылған, деп хабарлайды tabigat.kz Су ресурстары және ирригация министрлігіне сілтеме жасап.
Ведомствоның мәліметінше, кешенді тазартуды салалық министрліктің қолдауымен «Қазсушардың» Ақмола облысындағы филиалы жүргізіп жатыр. Су қоймасын тазартуға арнайы екі техника жұмылдырылған: сағатына 2000 текше метрге дейін түрлі шөгінділерден тазартатын үлкен жерснаряд және қуаты сағатына 900 текше метрге дейін жететін көпфункционалды әрі өздігінен жүретін шағын жерснаряд.
Фото: Су ресурстары және ирригация министрлігі
Биыл Астана су қоймасынан 50 мың тонна лай шығару жоспарланған. Тазарту қазанның соңына дейін жалғасып, жыл сайын 13 жыл бойы жүргізіледі. Нәтижесінде Астана су қоймасының сыйымдылығы 47 млн текше метрге артады. Нысан көбірек су жинап, елорда тұрғындарын сумен қамтамасыз етуді жақсартуға мүмкіндік береді. Астана су қоймасы 1970 жылы пайдалануға берілген. Бүгінде нысанды түбіндегі шөгінділерден тазарту алғаш рет жүргізіліп жатыр.
Фото: Су ресурстары және ирригация министрлігі
“Президенттің тапсырмасын орындау үшін арнайы мамандар тобы құрылды. Барлық қызметкер арнайы техникамен жұмыс істеу үшін қажетті оқытудан және дайындықтан өтті. Астана су қоймасы – елорданы сумен қамтамасыз етуде маңызды рөл атқаратын стратегиялық нысан. Заманауи техниканың арқасында біз бұл су қоймасын жарты ғасырдан кейін алғаш рет тазартып, жұмысты жақсы әрі тиімді атқара аламыз”, – деді Су ресурстары және ирригация министрі Нұржан Нұржігітов.
