Астанада Үндістанның Қазақстандағы tлшілігі Үндістан қорғаныс өнеркәсібі өкілдері, Қазақстанның қорғаныс өнеркәсібі кәсіпорындары және Қорғаныс министрлігі өкілдері үшін ортақ алаң орнату мақсатында Қорғаныс өнеркәсібі семинарын ұйымдастырды, деп хабарлайды infotabigat.kz.
Семинарға Үндістанның қорғаныс саласындағы 12 кәсіпорны (DPSU және жеке компаниялар) атынан 18 өкіл қатысты. Сонымен қатар, Қазақстан тарапынан 40 өкіл (ҚР Қорғаныс министрлігі, «Қазақстан Инжиниринг» және жеке қорғаныс компаниялары өкілдері) қатысып, үндістандық компаниялар өздерінің мүмкіндіктері мен өнімдерін таныстырды. Іс-шара болашақтағы ынтымақтастық пен серіктестікке жаңа мүмкіндіктер ашты. Жалпы алғанда, семинарда қысқаша баяндамалар мен презентациялар, компаниялар ұсынатын өнімдер мен мүмкіндіктердің көрсетілді, сондай-ақ екі елдің қорғаныс өнеркәсібі мен Қорғаныс министрлігі өкілдерінің тығыз өзара әрекеттесуі ұйымдастырылды, нәтижесінде бірқатар талқылаулар мен жаңа бағыттар пайда болды.
Елшіліктің мәліметінше, Қазақстанның Қорғаныс министрлігі офицерлерінің көптеп қатысуы Қазақстанның Үндістанмен стратегиялық және қорғаныс саласындағы әріптестікті тереңдетуге үлкен мән беретінін көрсетті. Бұл семинар стратегиялық әріптестік шеңберіндегі мүмкіндіктерді зерделеп, қорғаныс саласындағы бірлескен әзірлемелер, технологиялар жеткізу және өнеркәсіптік ынтымақтастық жөніндегі құрылымдалған сұхбаттарды бастау алаңы ретінде қарастырылды. Үндістанның Қазақстандағы төтенше және өкілетті елшісі Шри Я. К. Сайлас Тангал делегаттарға арнаған негізгі баяндамасында «ашылған мүмкіндіктерді толық пайдаланып, бірлескен әзірлемелер мен бірлескен кәсіпорындарды дамыту рухын күшейту қажет» екенін атап өтті.
Соңғы онжылдықта Үндістанның қорғаныс өнеркәсібі елеулі трансформация кезеңінен өтті. «Аатманирбар Бхарат» – яғни «өзін-өзі қамтамасыз ететін Үндістан» тұжырымдамасы аясында отандық өндірісті, инновацияларды, стартаптарды және экспортты дамытуға бағытталған ауқымды реформалар жүргізілді. Бүгінде Үндістан жоғары сапалы, сенімді және қолжетімді қорғаныс жабдықтары мен технологияларын экспорттаушы ел ретінде танылып келеді. Үндістанның мемлекеттік және жеке компаниялары жер үсті және теңіз платформалары, зымырандар, электроника, дрондар, жасанды интеллект және киберқауіпсіздік шешімдеріне дейінгі кең ауқымдағы өнімдерді шығарады.
Дипломатиялық өкілдіктің хабарлауынша, Қазақстан Үндістан үшін ерекше маңызға ие. Екі ел арасындағы қорғаныс саласындағы ынтымақтастық жылдар бойы бірлескен әскери жаттығулардан бастап жоғары деңгейдегі диалогтарға, әлеуетті арттыруға және мақсатты дайындық бағдарламаларына дейін тұрақты дамып келеді. Үндістан мен Қазақстан арасындағы әскери ынтымақтастықты сипаттайтын өзара түсіністік пен сенім екіжақты қарым-қатынасты өнеркәсіптік және технологиялық салаларда да кеңейтуге берік негіз қалайды.
Үндістан мен Қазақстанның қорғаныс компаниялары арасында бірлескен әзірлемелер, бірлескен өндіріс және жеткізу тізбектерін интеграциялау бойынша үлкен әрі перспективалы мүмкіндіктер бар. Үндістан Қазақстан үшін қорғаныс саласында сенімді және ұзақ мерзімді серіктес болуға дайын. Бұл бағыт өзара құрметке, ортақ мүдделерге және халықтарымыз арасындағы мәңгі достық рухына негізделген. Үндістаннан Қазақстанға биыл басталған бірқатар жеткізілімдер екі ел арасындағы қорғаныс экспортының алғашқы қадамдары болды, ал болашақта бұл бағыттағы ынтымақтастық пен прогресс арта түсетіні сөзсіз. Семинар Үндістан мен Қазақстан қорғаныс компанияларының өкілдеріне ортақ әрі тиімді алаң ұсынып қана қоймай, жақын болашақтағы бірқатар екіжақты кездесулердің басталуына себеп болды. Елшілік осындай семинарды жыл сайын өткізуді жоспарлап отыр және бұл қадам Үндістан мен Қазақстан арасындағы әскери ынтымақтастықты одан әрі тереңдетуге маңызды үлес қосады.