Солтүстік Қазақстан облысында жастар арасында экологиялық мәдениетті қалыптастыру жұмыстары жалғасып жатыр. «Таза Қазақстан» бағдарламасы аясында өткен «Эко IQ: Таза Қазақстан» зияткерлік ойыны студенттердің экологиялық сауаттылығын арттыруға, сыни ойлау мен командалық өзара іс-қимылын дамытуға бағытталды, деп хабарлайды infotabigat.kz облыс әкімдігінің баспасөз қызметіне сілтеме жасап.
Ойын екі кезеңнен тұрды: бірінші кезеңде командалар экология мен қалалық тазалыққа қатысты сұрақтарға жауап берсе, екінші кезеңде қатысушылар миға шабуыл форматында тақырыптық терминдерді тез түсіндірді. Іс-шара ұйымдастырушылары бұл формат студенттерге экологиялық мәселелерді талқылауға және алған білімдерін күнделікті өмірде қолдануға мүмкіндік беретініне сенімді.
Зияткерлік ойындарды өткізу идеясы жастар арасында экологиялық сауаттылықты арттыруға бағытталған бастамамыздың бір бөлігі ретінде пайда болды. Біздің мақсатымыз – студенттерге білім беру ғана емес, сонымен қатар сыни ойлау мен командалық жұмысты дамыту. Сондықтан біз бұл ойынды қалдықтарды сұрыптау, биоалуантүрлілікті сақтау секілді өзекті экологиялық мәселелерді талқылауға арналған тиімді алаң болады деп шештік. Қатысушылар алған білімдерін күнделікті өмірде қолдана алады деп сенеміз, – деді іс-шара ұйымдастырушысы, жастар саясаты бөлімінің маманы, «Birgemiz» волонтерлік фронт-офисінің үйлестірушісі Алмагүл Ғаббас.
Студенттер ойын барысында қалалық экологияны жақсарту бойынша ұсыныстарын ортаға салып, тәжірибе жинақтады. Қатысушылар белсенділігі дипломдармен және шағын сыйлықтармен бағаланды.
Сонымен қатар Петропавлда «Тазалық — тарихқа құрмет» атты экологиялық сенбілік өтті. Жастар ескерткіштер маңындағы аумақтарды тазалап, абаттандыру жұмыстарын жүргізді, бұл арқылы тарихи мұраға қамқорлық көрсету мен қаланың экологиялық әл-ауқатына үлес қосудың маңызын көрсетті.
СҚО-да мұндай іс-шаралар жастардың бойында тазалыққа, тәртіпке және қоршаған ортаны қорғауға саналы көзқарас қалыптастыруға ықпал етеді.