Қарқаралы үш күн бойы дрон пилоттары, тревел-энтузиастар мен аэрофототүсірілім мамандарының басын қосқан орталыққа айналды. Мұнда ASPAN FEST 2026 фестивалі өтіп, технология мен табиғатты тоғыстыра отырып, өңірді жаңа қырынан — биіктен таныстыруды мақсат етті, деп хабарлайды infotabigat.kz Қарағанды облысы әкімдігінің баспасөз қызметіне сілтеме жасап.
Фестиваль жыл сайынғы туристік слёт аясында ұйымдастырылды. Оған Қарағанды облысынан 17 пилот қатысып, Қарқаралы ұлттық паркінің ең көркем жерлерін түсіру тапсырылды.
Дрондардың объективіне панорамалық көріністерімен әйгілі Пионерлер шыңы, Мөлдіркөл көлі және Кент таулары ілікті.
Іріктеу қорытындысы бойынша қазылар алқасы сегіз қатысушының үздік жұмыстарын таңдады. Олардың барлығына Visit Karaganda туристік ақпараттық орталығының туризмді дамыту және ілгерілету бөлімінің амбассадоры мәртебесі берілді.
Біздің мақсатымыз — әдемі кадрларды ғана көрсету емес, өңірдің тартымды әрі тұрақты имиджін қалыптастыру. Бұл бағытта амбассадорлардың рөлі ерекше. Олар өз контенті арқылы Қарағанды облысын кең аудиторияға таныстырып, туристік ілгерілетудің визуалды стандартын қалыптастырады, — деді Visit Karaganda ТАО туризмді дамыту және ілгерілету бөлімінің басшысы Олжас Жанәділов.
Амбассадорлар алдағы уақытта контент әзірлеу мен оны тарату жұмыстарына белсенді қатысады. Олар фото және бейнематериалдар жариялап, жаңа локацияларды түсіріп, өңірді түрлі іс-шаралар мен әлеуметтік желілерде таныстыратын болады.
Фестиваль барысында түсірілген материалдар Қарқаралыны насихаттау мақсатында қазірдің өзінде пайдаланылып жатыр.
Жуырда олардың негізінде жарнамалық роликтер мен имидждік науқандар әзірленеді. Қазірдің өзінде жұмыстардың бір бөлігі Visit Karaganda Instagram-парақшасында жарияланған.