Түркістан облысына қарасты Ордабасы тауының бөктерінде Қазақстанның Қызыл кітабына енген сирек кездесетін – Корольков қызғалдағы гүлдеп, көздің жауын алуда, деп хабарлайды infotabigat.kz облыс әкімдігінің баспасөз қызметіне сілтеме жасап.
Жыл сайын еліміздің оңтүстік өңірлерінде ғана кездесетін бұл нәзік гүл – табиғаттың баға жетпес байлығы. Әсіресе, Ордабасы ұлттық-тарихи мәдени қорық аумағында оның ерекше көптеп шығуы – биылғы көктемнің көркем көріністерінің біріне айналды.
Жұпар иісі аңқыған, көз сүйсіндірер көркем келбетімен жанға жылулық сыйлайтын Корольков қызғалдағы – табиғаттың шынайы ғажайыптарының бірі. Оның әрбір күлтесі – сұлулық пен нәзіктіктің белгісіндей. Сонымен қатар сирек кездесетін бұл өсімдік ерекше қорғауды қажет етеді. Табиғи мұрамызды сақтау және оны келер ұрпаққа жеткізу – баршамыздың ортақ міндетіміз, – дейді мамандар.