Астана қаласында Корея Республикасы Елшілігі ұйымдастырған маскот жасау байқауында қазақстандық қатысушы Аружан Какешова жеңімпаз атанды. Оның «Хани мен Нури» атты жұмысы екі ел арасындағы достық пен мәдени ынтымақтастықтың символы ретінде таңдалды, деп хабарлайды infotabigat.kz.
Байқау 13-28 наурыз аралығында өтіп, Корея мен Қазақстан арасындағы мәдени алмасуды ілгерілетуге бағытталды. Жалпы саны 55 өтінімнің ішінен үздік 8 жұмыс іріктеліп, соңғы жеңімпаз қоғамдық дауыс беру және сарапшылар бағалауы арқылы анықталды. Дауыс беру Қазақстанның жетекші университеттері мен Астанадағы корей мәдени орталығында өтті.
Жеңімпаз маскот — Хани мен Нури — екі кейіпкерден тұрады. Хани — Кореяны бейнелейтін жолбарыс болса, Нури — Қазақстанды бейнелейтін барыс. Кейіпкерлердің дизайнында екі елдің мәдени элементтері үйлесімді түрде біріктірілген.
Маскот тұжырымдамасы достық пен тең құқықты серіктестік идеясына негізделген. Кейіпкерлердің төл ретінде бейнеленуі — екі ел арасындағы қарым-қатынастың бірге дамып, нығая түсетінін білдіреді. Дизайнда Кореяның ұлттық гүлі — мугунхва, қазақтың ою-өрнектері, сондай-ақ екі елдің мемлекеттік рәміздерінен алынған элементтер қолданылған.
15 сәуір күні Корея Республикасының Қазақстан Республикасындағы Елшілігінде өткен марапаттау рәсімінде жеңімпазға арнайы диплом мен бағалы сыйлық — смартфон табысталды.
Ұйымдастырушылардың айтуынша, «Хани мен Нури» маскоттары алдағы уақытта түрлі мәдени іс-шараларда қолданылып, екі ел арасындағы достықтың символына айналмақ. Сонымен қатар, Елшілік мәдени ынтымақтастықты дамыту бағытындағы жұмыстарын жалғастыра береді.
Өз сөзінде Аружан Какешова бұл жеңістің өзі үшін үлкен мәртебе екенін атап өтті. Ол маскот арқылы достық, ашықтық және бірге даму идеясын жеткізгісі келгенін айтты. Сондай-ақ, ол өзіне қолдау көрсеткен барлық қатысушылар мен ұйымдастырушыларға алғыс білдірді.