Батыс Қазақстан облысында «Таза Қазақстан» экологиялық акциясы аясында жастар арасында «Экоквест» шарасы өтті, деп хабарлайды infotabigat.kz облыс әкімдігінің баспасөз қызметі.
«Таза Қазақстан» тұжырымдамасын насихаттауға арналған жастар арасында шара ұйымдастырылды.
Орал қаласында өзен жағалауында «Таза Қазақстан» жалпыұлттық экологиялық акциясы аясында «Экоквест» шарасы өтті. Іс-шараның негізгі мақсаты – «Таза Қазақстан» тұжырымдамасының идеологиясын кеңінен насихаттау, жастар арасында экологиялық мәдениет пен жауапкершілікті қалыптастыру, қоршаған ортаға ұқыпты қарау құндылықтарын дәріптеу.
Шараға қаламыздың белсенді жастарынан құрылған топтар қатысты. Іс-шара барысында алдын ала жасақталған топтар өзен жағалауларын қоқыстардан тазарта жүріп, қызықты тапсырмалар орындау арқылы сайысқа түсті.
Бүгінгі шараның басты мәні – жастарға «Таза Қазақстан» идеясын дұрыс түсіндіру және олардың белсенді азаматтық ұстанымын қалыптастыру. Экологиялық мәдениет – ел болашағының сапасын айқындайтын маңызды фактор. Осы бағытта жастардың бастамаларын қолдау – біздің негізгі міндетіміз, – деді БҚО Жастармен жұмыс жөніндегі ресурстық орталығы басшысының орынбасары Нұрсұлтан Сарсенбаев шараның ашылуында.
Квест барысында белсенді жастар өз ойларын ортаға салып, түрлі бағыттағы экологиялық мәселелердің шешу жолдарын ұсынып, ортақ талқылау алаңын құрды. Экологиялық волонтерлік, жастар жобалары мен бастамаларды қолдау мәселелері де талқыланды.
Ұйымдастырушылар мұндай шаралардың алдағы уақытта да жалғасатынын атап өтіп, өңір жастарын «Таза Қазақстан» акциясы аясындағы экологиялық іс-шараларға белсенді қатысуға шақырды.