«Алтын-Емел» мемлекеттік ұлттық табиғи паркінде жабайы табиғаттың ерекше сәті фототұзаққа түсті — бір суат басында бүркіт пен қарақұйрықтар қатар кездесті, деп хабарлайды infotabigat.kz Экология және табиғи ресурстар министрлігінің баспасөз қызметі.
Табиғатта олардың жолы түйіссе, бірі — жыртқыш, екіншісі — ықтимал жемтік. Алайда бұл жолы бәрі басқаша болды. Кадрда бүркіт пен қарақұйрықтар бір-біріне жақын болғанына қарамастан, ерекше алаңдаушылық танытпай, сабырлы күйде көрінеді.
Бүркіт қарақұйрықтың жас төлдеріне шабуыл жасай алатын жыртқыш болса, қарақұйрықтар әдетте одан сақ жүреді. Сондықтан Алтын-Емел табиғатындағы олардың бір суат басында осылай қатар болуы — назар аударарлық көрініс.
Мұндай мінез-құлыққа аптап ыстық пен суға деген қажеттілік әсер етуі мүмкін. Жаздың ыстығында суаттар жабайы жануарлар үшін аса маңызды орынға айналады. Кей сәтте шөлді қандыру қажеттілігі қалыпты сақтықтан да басым түсуі мүмкін.
Ал фототұзақ Алтын-Емелдің жабайы табиғатындағы осы ерекше сәттің үнсіз куәгері болды.